Nwunye Dim Chukwuemeka Odumegwu Ojukwu, Ikemba Nnewi na Dikedịọramma ndịigbo, bụ Odoziakụ Bianca Ojukwu akpọọla Gọvanọ na-achị Steeti Anambara bụ Willie Obiano ọkụkọ amaghị onye foro ya ọdụ nʻudummiri. Nke a mere mgbe a na-eme mmemme e ji echeta dike ndịigbo lara mmụọ bụ Dim Odumegwu Ojukwu nke e mere na Mahadum Odumegwu Ojukwu dị nʻỊgbaarịam. Gọvanọ Obiano ejeghị mmemme ahụ.
Mgbe ọ na-ekwu okwu, Odoziakụ Bianca Ojukwu gbarụrụ ihu wee kwuo na nke a bụ nke ugboro abụọ Maazị Obiano abịaghị ya bụ mmemme nke a na-eme kwa afọ. Odoziaku Ojukwu gwara Osote Gọvanọ bu Maazị Nkem Okeke, nke kwuru na ya na-anọchite anya Maazị Obiano, ka ọ gwa Maazị Obianọ na o chefuole na ọ bụ Dim Chukwuemeka Ojukwu mere ya ihe ọ bụ taa. Odoziakụ Ojukwu kwuru na ọ bụ ihe mwute na ya bụ Maazị Obiano enweghi ike wepụta ohere bịa soro ibe ya kwanyere onye e ji maka ya gbakọọ ebe ahụ ugwu ruoro ya.
Okwu a ebutele nnukwu ndọrọndọrọ na Steeti Anambara. Ụfọdụ mmadụ na-akwado ihe Odoziakụ Ojukwu kwuru ebe ndị ọzọ na-asị na etu o siri dowe ọnụ kwuo ya bụ okwu adịghị mma.